Skeealyn Vannin, Disk 2 Track 16: Speaker: Thomas Dodd, Peel
https://www.youtube.com/embed/mcN1gdOgMagDate(s): 1948
Creator(s): Irish Folklore Commission
Transcript: St Matthew, Chapter 2
Yn nah cabdil jeh’n sushtal scruit liorish yn Noo Mian.
1. Nish tra rug Yeesey ayns Bethlehem dy Yudea, rish lhing ree Herod, cur-my-ner haink deiney creeney veih’n shiar gys Jerusalem,
2. Gra, Cre vel Ree ny Hewnyn t’er jeet er y theihll? son honnick shin y rollage echey ayns y shiar, as ta shin er jeet dy chur ooashley da.
3. Tra cheayll Ree Herod shoh, v’eh dy mooar seaghnit, as ooilley Jerusalem marish.
4. As tra v’eh er symney cooidjagh ooilley ny ard-saggyrtyn, as scrudeyryn y phobble, denee eh jeu cre’n raad va Creest dy heet er y theihll.
5. As dooyrt adsyn rish, Ayns Bethlehem dy Yudea: son shoh myr te scruit liorish y phadeyr:
6. As uss Vethlehem ayns cheer Yudea, cha nee oo sloo ta mastey princeyn Yudah: son assyd’s hig Kiannoort nee reill my phobble Israel.
7. Eisht hug Herod fys follit er ny deiney creeney, as deysht eh ad dy imneagh mychione y traa haink yn rollage rish.
8. As hug eh ad gys Bethlehem, gra, Immee-jee, as shir-jee magh dy jeidagh son y lhiannoo, as tra vees shiu er gheddyn magh eh, tar-jee lesh fys hym’s, dy voddym’s neesht cheet as ooashley y choyrt da.
9. Erreish daue v’er chlashtyn y ree, jimmee ad rhymboo, as cur-my-ner hie yn rollage honnick ad ayns y shiar er e toshiaght roue, derrey haink ee, as hass ee erskyn yn ynnyd raad va’n lhiannoo.
10. Tra honnick ad y rollage, va boggey erskyn-towse orroo.
11. As goll stiagh ’sy thie, hooar ad y lhiannoo marish Moirrey e voir, as gliooney sheese, hug ad ooashley da as fosley ny tashtaghyn oc, heb ad giootyn da; airh, as frankincense, as myrrh.
12. As myr va Jee er chur raaue daue ayns ashlish, gyn ad dy hyndaa gys Herod, ghow ad raad elley gys nyn jeer hene.
13. As tra v’ad er n’immeeaght, cur-my-ner haink ainle y Chiarn gys Joseph ayns ashlish, gra, Trog ort, gow yn lhiannoo as e voir, cosne royd gys Egypt, as fuirree ayns shen derrey ver-yms fys hood: son shirree Herod y lhiannoo dy stroie eh.
14. Eisht dirree eh, as ghow eh yn lhiannoo, as e voir ayns yn oie, as hie eh roish er-chea gys Egypt:
15. As shen-y raad v’eh derrey baase Herod: as shoh myr va cooilleenit shen loayr y Chiarn liorish y phadeyr, gra, Magh ass Egypt deie mee er my vac.
(Transcribed by Phil Gawne, Cregneash, Rushen)
Language: Manx
Collection: Sound Archive
Level: WHOLE
ID number: SA 0579/2/16